ASV Atletica Gherdëina Raiffeisen ASD
ASV Atletica Gherdëina Raiffeisen ASD
ASV Atletica Gherdëina Raiffeisen ASD

News

07. Dec
2018

Stefan Planker a cë de una dla majera lies sportives de Gherdëina: l Atletica Gherdëina Raiffeisen

Chëst’ann ie stat per l’Atletica Gherdëina Raiffeisen n ann particuler dal pont de ududa di resultac per la lia: bën doi iedesc ie Alexander Demetz ruvà sun l podest pra i campionac talians assoluc tla proves multiples. L titul de vize campion àl arjont a Padova de jené 2018 tl eptathlon indoor y la bedaia de bront ie sauteda ora a Pescara de setëmber tl decathlon, demustran de vester un di mieur atlec talians assoluc. Chisc resultac, deberieda cun trueps d’autri danter titui provinziei, regiunei y Grand Prix ti à dat a dut l team na gran sodisfazion, legrëza y ueia de fé inant. La lia dl Atletica Gherdëina Raiffeisen fova unida metuda su tl 1992 y ie da ann a ann cresciuda. Cun truep apasciunei y ulenteres che juda a alené y urganisé duta l’ativiteies, tol la lia pert a truepa manifestazions y garejedes a uni livel mescedan pea n cont di resultac no me a livel provinziel o regiunel, ma nce naziunel.

Da d’autonn fovela inò tan inant, la se tratova per la lia de lité n cunsëi nuef. Pra la senteda generela iel unìi auzei ora i aspec y l’andamënt positiv dl l’Atletica Gherdëina Raiffeisen. Dldut plajëi ti à dat al vedl cunsëi l fat che pra la nueva veles fovel inò truepes che se à metù a disposizion per lauré pea, nsci che l ie nce unì auzà l numer da 7 a 9 di rapresentanc te cunsëi. La lia ie al didancuei una dla majera lies dal sport te Gherdëina n cont de scric ite y cun si doi sezions, da una na pert dl atletica y dal’autra dla ginastica artistica, cumpëida la lia bën passa 200 scric ite.

Dat ju si nceria alincontra à l presidënt Siegfried Runggaldier che per sies ani ie stat a cë dla lia. Na gran lauda ti va a Ruggaldier per si gran lëur y mpëni che l’à fat te si doi legislatures. Siegfried Runggaldier fova bele zapà ite tla lia tl 1995 y da ilò incà fovel stat per truep ani tl cunsëi, pona per n struf coche revisëur di conc y ala fin mo per bën sies ani presidënt. Zapei ora ie nce Roland Perathoner y Ivonne Senoner, nce ëi ie stac per sies ani tl cunsëi y ne ciafieia nia plu per rejons persuneles a  se mëter inant a disposizion, ma che à purmpò mpermetù de judé pea sce la jissa debujën n ucajion de vel manifestazion sportiva.

Tl cunsëi che manejerà la lia dal 2019-2021 iel unì lità coche presidënt Planker Stefan. Planker ie dal 1994 pra l’Atletica lesiera y ie stat per 15 ani trainadëur. Ël ova scumencià a fé cun si atlec la prima garejedes sun pista y alenova da ilo inant nce la disciplines plu tecniches y desferëntes dl atletica lesiera. Coche vize presidënta y respunsabla dla sezion ginastica artistica ie unida liteda Rella Elena. Tl cunsëi iel nce Rungger Heidi, Lambacher Doris, Candelori Giampiero, Demetz Alexander, Frontull Hubert, Vian Lucia y Insam Verena. Danter i trainadëures iel Kostner Walter Delladio Denise y Runggaldier Monika. 

Al cunsëi y ai atlec ti augurons dut l bon y che i ebe inant mo truepa legrëza a lauré per l sport dl atletica.

04. Sep
2018

La surans Goffi inant dancà pra i Grand Prix

Nstadì, ai 02 de setëmber fovel sun l program l Grand Prix de Atletica lesiera do che i atlec à paussà ntan l'instà. L Grand Prix ie na sort de capiunat de atletica ulache la se trata de se davanië ponc aldò di resultac che n arjonj. Vëncer vënc l'atleta o atlet che ala fin dla sajon ie stat l plu cumplet, chël uel di che l muessa vester stat bon tla disciplines de sauté (distanzes longes o curtes), vester stat bon de tré sauc (saut aut y saut lonch), ma nce de tré massaries coche l pëis, l disch o la lanza.

L'atletes de Gherdëina, alenedes a Walter Kostner, se á inó batú a n boniscimo livel demustran coche bele ntan duta la sajon de avester al autëza dla concurënza. Ëiles à purtà al'Atletica Gherdëina Raiffeisen doi bedaies d'or, doves d'arjënt y una de bront fajon de bona prestazions nce sce n à messù garejé sota na gran jeta.

Tla categuria dla Sculees A, ie stata Goffi Chiara a zapé trëi iedesc sun l podest, vencian sibes tla garjeda tl smaché la lanza (33,66 m.), che nce tl saut tripl (10,75 m), ma ruvan nce al terzo post tl sauté i 80 m cun rëmes (13,13).

Tla medema categuria ie Jana Tomasini ruveda al 5. post tl smaché l disch y al 8. post tl sauté i 80 metri cun rëmes.

Pra la mutans categuria B ie Goffi Alessia ruveda al 2. post tl saut lonch (4,24 m), ma nce tl smaché l pëis (8,66 m). Ti 60 metri sprint iela da udëi iusta sota l podest al 4. post. Tla medema categuria á nce garejà Windegger Daiane (5.post ti 60 m ; 7. post tl saut lonch), Karbon Alice (cun n bon 4. post tl saut lonch y n  6. post ti 60 m), Ploner Sabrina ( 11.post ti 60 m, 12.post tl smaché l pëis y 15. post tl saut lonch) y Frontull Maria (13.post tl saut lonch y 14.post tl smaché l pëis).

Inant jirala la proscima ena, ai 07 y 08 de setëmber cun i Campionac talians assoluc ulache l se à cualificà doi atlec dl Atletica Gherdëina Raiffeisen, y plu avisa Alexander Demetz y Alex Verginer. De chësta garejedes, che unirà fates a Pescara, fajerons mo na analisa plu avisa che publicheron sun la homepage..

Per l'Atletica Gherdëina Raiffeisen
Stefan Planker

26. Jun
2018

Grand Prix te Gherdëina: Samuel Demetz vënc la garejeda di 2000 m

Nstadì iel unì metù a jì laterza garejeda dl capionat de atletica lesiera Grand Prix Ladurner 2018. I urganisadëures fova chëst’iede l‘Atletica Gherdëina Raiffeisen.

Coche uni ann, iel nce chëst’ann unì metù a jì te Gherdëina na garejeda de atletica lesiera per la categuries A y B di sculeies. La manifestazion ie stata ai 15 de juni, de vënderdi da sëira ulache la partezipazion fova purmpò bëndebo auta sce n pënsa che l fova propi l di ulache la scola finova via. La cundizions per la garejeda fova dldut adatedes cun surëdl ma nia massa ciaut, nce sce cun mpue de vënt de contra pra la garejedes de sauté.

Dal pont de ududa dla prestazion de nosc atlec iel da auzé ora la bona garejeda de Samuel Demetz ti 2000 metri. Samuel ie spezialist tl sauté distanzes plutosc longes y à bele chisc ultimi ani demustrà de vester pra i mieures de Südtirol te si categuria. Nsci iela nce stata a Santa Cristina. Te na garejeda dldut tatica ti iel stat do a si averser che à trat per feter duta la garejeda, canche al autëza di 200 metri dal travert al auzà si ritm ti jan dant al concurënt de Maran y l batan ala fin mpo de truep secunc. Samuel Demetz à nsci vënt cun n tëmp de 6,31,82 dan Rossi Paolo dl AS Meran 6,35,72 y Vianello Leonardo dla SAF Bolzano 7,22,18.

Truep autri podesc‘ ie garatei per l’atletes de Gherdëina. Publicon tlo la prima trëi posizions arjontes.

Da auzé ora iel nce Goffi Alessia che à venciù l saut aut cun na mesura de 1,43, ie ruveda segonda tl smaché l pëis (9,28m do Haller Linda de Passeier che à arjont i 9,60 m.) y terza ti 600 metri cun l tëmp de 1,57,05. Nce Chiara Goffi ie zapeda doi iedesc sun l scialir dl podest, un n iede ruvan segonda ti 80 metri cun rëmes ( 13,30 sec.) y l auter, nce tlo segonda, tl smache la lanza (38,93 m). Par l smaché la lanza à venciù Fischnaller Sarah trajan l record provinziel de categuria cun na mesura de 44,70 metri.

Na gran lauda ti je jita da pert dla Fidal al Atletica Gherdëina Raiffeisen per avëi metù a jì tan apuntin la garejeda. N rengraziamënt ti va a nosc presidënt Siegfried Runggaldier per se avëi cruzià de mëter a jì la garejeda, a duc i ulenteres che à judà ntëurite, a nosc trainadëures che cun pascion nsënia ju nosc atlec y ai atlec y ala atletes nstësc per la boniscima prestazions.

 

Per l’Atletica Gherdëina Raiffeisen 

Stefan Planker

07. Jun
2018

Allessia Goffi vënc la bedai d’or a Persenon y se cualifichea per i campionac talians de categuria

Nstadì, y plu avisa ai 2 y 3 de juni fovel sun l program dl atletica lesiera la garejedes che valova per la l titul provinziel dla proves multiples tla categuria sculees y sculeis B. Coche on bele abù ucajion de scrì plu iedesc, ie l’atletes y i atlec dl’Atletica Gherdëina Raiffeisen bele da truep ani che mëscëida pea pra i mieures dla provinzia y dla region y nce tla sajon 2018 ne n’iela nia autramënter. A Persenon y a Trënt àn propi te chësc ultim fin dl’ena inò demustrà l gran valor y la bona preparazion che dl’Atletica Gherdëina Raiffeisen ie bona de ti dé a si atlec. Defati ie Alessia Goffi stata bona de se fé valëi te tramedoi ucajions: la prima a Persenon ulache la se tratova de se bater per la bedaia d’or y l titul da campiunëssa provinziela cun l mesum de se cualifiché pra i campionac talians, cossa che ti ie garateda defin, a Trënt de se museré pra n meeting, for tla proves multiples cun na partezipazion de bën 79 atletes da duta la region. Mbën, nce tlo iela stata la mieura de dutes demustran cun si prestazions de vester a n livel dastramp aut. Una dla dificulteies dla proves multiples ie propi chëla de vester cumplec coche atlec. Per vester boni muessen demustré capaziteies deferëntes, sibes tl sauté (distanza asvelta y distanzes plu longes) che ti sauc (saut lonch o saut aut) y tl smaché la massaries (vortex, codla o pëis). La soma di ponc che vën cumpedei adum pra uni pestazion fej ora la tlassifica, daviadechël possen nce avëi vel atlet o atleta che nce sce la ie mpue plu dëibla te una o l’autra disciplina, possela purmpò se vëncer la garejedacomplessiva. Pra Alessia Goffi alincontra sautel tl uedl che la se bat te uni disciplina dla proves multiples per la mieura prestazions. Pra i sauc tëniela pea pra la mieures, avisa coche pra l smaché la massaries coche nce pra l sauté.

Tla categuria B iel da fé l triatlon, chël uel dì trëi disciplines che se giamieia juda da iede a iede. A Persenon mé per dì fovel da fé i 60 metri, l saut lonch y smaché l pëis, a Trënt messova l’atletes sauté i 600 metri, fé l saut lonch y smaché l vortex. Tlo à Alessia venciù l saut lonch, ie ruveda segonda ti 60 m sprint y segonda tl smaché l pëis. Ala fin iela ruveda prima cun 1909 ponc. La segonda ie stata Bramazza Federica dla SAF Bolzano cun 1830 ponc. Danter la 10 mieures iel nce al 8. post Karbon Alice cun 1648 ponc.

A Trënt à la portaculëures de Gherdëina Alessia Goffi venciù i 600 metri (tëmp de 1,51,94), l saut lonch (mesura de bën 4,55 metri) y segonda tl vortex (34,39 metri), batuda da si cumpania Jenegger Selina (36,93 metri) che sun 79 atletes ie ruveda complessivamënter al boniscimo 5.post.

Tla tlassifica finela pra la garejeda a Trënt à donca Alessia venciù cun 2100 ponc, dan Merighi Gloriadla Atletica Alto Garda e Ledro (1878 ponc) y Antolini Sara dla Atletica Tione cun 1846 ponc. Jenegger Selina ie ruveda 5. cun 1825 ponc.

Cun chisc resultac se à Alessia cualificà ai campionac talians de proves multiple te si categuria che sarà ai 22 de setëmber a Rimini.

N gran cumplimënt ti va a duta la atletes de Gherdëna che à fat pea y a Walter Kostner che se dà ju cun pascion y lezitënza ti stajan danieura daujin a nosta atletes.

 

Per l’Atletica Gherdëina Raiffeisen

Stefan Planker

25. Apr
2018

Atletica Gherdëina Raiffeisen: la surans Goffi ie danter la primes tl Grand Prix de atletica lesiera

L Grand Prix 2018, che ie n campionat de atletica lesiera cun plu ancuntedes y garejedes desfrëntes y che se stluj ju d’autonn, à scumencià cun l drë var per la atletes dl Atletica Gherdëina Raiffeisen, dantaldut per la surans Goffi de Urtijëi. Bele pra l prim Grand Prix ai 07 de auril ova la doi surans venciù de ndut 6 bedaies, ruvan uni una trëi iedesc sun l podest. La surans Goffi à nsci arjont tl prim Grand Prix chisc resultac: Alessia ie ruveda 2. sibes tl saut lonch (4,30 m) che tl smaché l pëis (7,92) y terza ti 60 metri sprint; Chiara segonda sibes ti 300 mteri (51,00 secunc) che tl saut aut (1,49) y terza tl smaché l disch (22,57). Chisc resultatc  ne n’á iusta nia bastà per zapé sun scialir plu aut dl podest. L scialir plu aut alincontra ti ie garatà a Samuel Demetz pra l sauté i 1000 metri. Samuel ie sautà l km te 1,47 menuc demustran de vester te na bona forma te una dla disciplines che ti plej l plu.

Pra l segondo Grand Prix, che ie unì fat ai 14 de auril, ie inò stat n gran suzes per la atletes de nosta valeda y chëst iede nia mé cun la surans Goffi che bele inò se à lascià udëi cun si biei resultac, ma nce de gra a si cumpanies Selina Jenegger y Alice Karbon. Alessia Goffi ie ruveda prima pra l sauté i 60 metri cun rëmes (10,07 secunc) y segonda tl saut aut cun 1,31 m. Tla medema categuria ie Selina Jenegger  stata bona de se davanië la bedaia d’or tl smaché la codla che ie juleda 35,70 m. lonc ti mpermetan de ruvé prima. N autra bedaia, chëla d’arjënt ti ie jita a Chiara Goffi tl smaché l pëis (10,45 m) y una de bront à pudù pië do Alice Karbon ti 60 metri cun rëmes ferman l tëmp a 10,54 secunc.

Inant jirala cun l terzo  Grand Prix che unirà metù a jì a Santa Crestina ai 15 de juni.

 

Alexander y Alex pra l Multistar a Firenze

N autra sodisfazion per i dirigënc y atlec dl Atletica Gherdëina Raiffeisen ie la convocazion di doi atlec de livel naziunel de nosta lia pra l 31. ejm Multistar a Firenze che unirà fat ai 27 y 28 de auril. La se trata de n meeting de decathlon cun na partezipazion internaziunela pra chëla che l tol pert atlec de livel mundiel. Sce dal pont de ududa dl resultat ne saràl per Alexander Demetz y Alex Verginer nia mesum tenì pea, iel da l’autra pert n ucajion de se museré a livel plu aut y udëi tan inant che i ie tla preparazion. L fin de nosc atlec tl 2018 ie chël de fé de de bon resultac pra i campiunac talians assoluc tla proves multiples che unirà fac de setëmber, defati duta la preparazion vën fata sun mesura propi per chël apuntamënt.

 

Per l’Atletica Gherdëina Raiffeisen

Stefan Planker

19. Mar
2018

Chiara Goffi vënc la bedai d’or a Minca

L tradiziunel  meeting indoor Werner von Linde Sport Fest  a chël che l’Atletica Gherdëina Raiffeisen fej pea bele da truep ani, y che ie un di apuntamënc plu mpurtanc dan che l mët man la sajon ufiziela per i atlec dl’atletica, ie unì metù a jì chëst’ann n dumënia ai 10 de merz 2018. Nce chëst ann ie nosta lia jita a garejé cun n valgun atlec, 7de ndut, per ruvé ite tl atmosfera dla garejedes y per udëi coche n ie cun la preparazion. Coche feter uni ann, nsci iela nce stata chëst’ann iel unì a s’l dé n resultat mpurtant. Ciara Goffi de Urtijëi ie stata bona de se fé valëi pra duta la concurënza tla categuria dla sculees A, vencian la bedaia d’or tl saut aut. Cun na prestazion de marueia ie Chiara stata bona de ti vester ala concurënza cun na gran cumpëida de atletes che vën coche uni ann dal Bayern, Baden Würtenberg,  dal Tirol ma nce da Südtirol y dal Trentin. La mesura arjonta da Goffi ie stata de 1,53. La segonda ie stata Knyrim Jennifer dl Club TV Immenstadt nce ëila cun 1,53, ma cun plu fai,y la bedaia de bront ti ie jita  a Radis Sina dl LAG Garmisch Partekirchen cun1,50.  La mesura de Chiara ëssa nce fat  na gran paruda tla categuria plu auta. La prima trëi di U18 ie dutes cantes cun 1,53 ruvedes sun l podest.  Pra la categuria dla sculees A ie la portaculëures de Gherdëina, sce paradlon i resultac a livel Talian,  danter la 20 mieures dla Talia y chësc cun relativamënter puech alenamënt. Nsci, do l titul de vizecampion Talian de proves multiples indoor cun Alexander Demetz, ie chëst’ann garatà  bele n segondo gran resultat per l’Atletica Gherdëina Raiffeisen. Inant jirala per i atlec y atletes ai 7 d’auril canche scumencerà l Grand Prix, caraterisà da deplu garejedes sot forma de n campionat. A Chiara y a dut l team dl ATletica Gherdëina ti tenions i punies cun la speranza che la ti bute inant ntan duta la sajon.

Per l’Atletica Gherdëina Raiffeisen

Stefan Planker

30. Jan
2018

Alexander Demetz Vize Campion naziunel de atletica lesiera

Ai 27 y 28 de jené fovel sun l program de atletica lesiera i Campiunac Talians indoor de proves multiples tla categuries assolutes. Garejà iel unì tl bel palaz dl Palaindoor de Padova. Pra chisc campiunac se tratela de se davanië l titul naziunel tl eptathlon. Pra uni garejeda che n fej giaten ponc che vela n proporzion ala prestazion sportiva arjonta. Pra l’indoor, ne n fejun 7 de disciplines, canche pra l outdoor ne n’iel 10, l cunesciì decathlon. Garejà vëniel dedite, daviadechël ne possen nia smaché l disch o la lanza y l toma nce demez i 400 metri sprint. Pra l sprint y pra la garejeda cun rëmes vëniel fat i 60 metri mpede i 100 y 110 y l’ultima garejeda ie de 1000 metri mpede i 1500. Per l rest ie la garejedes medemes.

Pra i campiunac talians muessen se cualifiché, chël uel di che n muessa bele avëi arjont n iede ntan de ponc per pudëi fé pea.

Per l’Atletica Gherdëina Raiffeisen se à cualificà Alexander Demetz de Urtijëi che propi dan doi enes ova venciù a Padova n meeting tl eptathlon arjunjan l limit de partezipazion.

Chësc ultim fin dl’ena se tratovela pona dl titul talian y i presuposc‘ per arjonjer n terzo o cuarto post, almanca sun l papier, fova tlo.

Bele pra la prima garejeda, ti 60 metri sprint ie Alexander sautà n mumënt miec che dan doi enes, ruvan cun 7,22 secunc al 8. post. Chësc tëmp ti à valù 806 ponc.

Pra la segonda garejeda, tl saut lonch à Demetz demustrà si gran potenzial vencian la garejeda cun n saut de bën 7,30 metri. Chësta mesura ti à purtà 886 ponc se metan a cë dla tlassifica provisoria.

Tla terza garejeda messovel pona smaché l pëis de 7,26 kg. La mesura arjonta do trëi iedesc che n pudova tre, fova de 11,82, arjunjan 595 ponc. La posizion te chësta garejeda fova la sesta, ma restan danora tla tlassifica assoluta.

Venciù àl nce la cuarta y ultima garejeda dl prim di, tl saut aut. La mesura arjonta ie de 1,98 metri y mé per puech ne n’iel nia sautà sëura i 2,01 ora. Purmpò al stlut ju cun 785 ponc restan do l prim di de garejedes a cë dla tlassifica.

 

N dumënia fovel da fé trëi garejedes: i 60 metri cun rëmes, l saut cun la stangia (asta) y i 1000 metri.

Nce ti 60 metri cun rëmes iel stat bon de miuré si prestazion i sautan te 8,68. Te chësta disciplina iel ruvà al nono post purmpò ti àla purtà 818 ponc. Te tlassifica provisioria fovel sën al segondo post. 

Pra l saut cun la stangia ti àla mpue sciacà, nce sce l se ova dat ju ti alenamënc plutosc intensif te chësta garejeda. Cun feter 30 atlec che fajova pea à la garejeda durà passa trëi ëura y mantenì la cunzentrazion per n tëmp tan lonch ie dastramp rie. La mesura arjonta ie de 4 metri nce sce l potenzial al mumënt ëssa pudù vester de 4,10 - 4,20. La undescejima posizion ti à mpo purtà 617 ponc y l’atlet de Gherdëina ie stat bon de se mantenì tla segonda posizion assoluta.

Pra l’ultima garejeda, ti 1000 metri se tratovela mo dala 9 da sëira, de fé l’ultima fadies y lauré de tatica ti cialan cun un n uedl al atlet che fova al terzo post y cun l’auter a chël che fova al cuarto. Alexander ie stat bon de ti ste dossu a tramedoi averseres per doi terzi dla garejeda, pona a n cer pont se ài destaché de n 15 metri. Cun artenienza y forza de ulentà se à mo l jëunn da Pilat trat su dassënn ti ultimi 50 metri ti ruvan dossù ai doi averseres plu periculëuses perdan, do la rissa dl travert feter degun tëmp sun l terzo y cuarto post de tlassifica. Ala fin fovel ti 1000 metri al 8.post cun l tëmp de 2,49,83, n tëmp che ti à purtà 767 ponc.

Do chësta bela garejeda plëina de emozions fovel ufiziel: Alexander Demetz ie Vize Campion Talian tla categuria di assoluc tla proves multiples indoor.

L Campion talian ie, coche bele l’ann passà Simone Cairoli dl Atletica Lecco cun 5517 ponc, al segondo post y nsci Vize campion talian ie Alexander Demetz Atletica Gherdëina Raiffeisen cun 5274 ponc, y la bedaia de bront ti ie jita a Marco Leone nce ël dl Atletica Lecco cun 5249 ponc.

N gran cumplimënt ti va a Alexander che nes dà for inò de gran sodisfazions y porta n gran inuem ai culëures dl Ateltica Gherdëina Raiffeisen. N rengraziamënt per l bon lëur ti va al alenadëur Walter Kostner, che vën judà dai trainadëures de Lana Karl Schöpf y Hubert Indra, al presidënt Siegfried Runggaldier y al cunsëi dl’Atletica Gherdëina Raiffeisen per coche i sustën duc si atlec.

 

Per l’Atletica Gherdëina Raiffeisen
Stefan Planker