ASV Atletica Gherdëina Raiffeisen ASD
ASV Atletica Gherdëina Raiffeisen ASD
ASV Atletica Gherdëina Raiffeisen ASD

News

07. Nov
2019

Convocazione Assemblea Ordinaria

I Soci dell’Associazione sportiva dilettantistica ATLETICA GHERDËINA sono convocati in assemblea ordinaria in prima convocazione presso Mulin da Coi a Santa Cristina, il giorno 03/12/2019, alle ore 20:00, ed eventualmente in seconda convocazione il medesimo giorno alle ore 21:00 sempre nel medesimo luogo, per esaminare il seguente ordine del giorno:

  1. Relazione del Presidente del Consiglio Direttivo sull’esercizio sociale anno 2019
  2. Presentazione ed approvazione del rendiconto economico anno 2019
  3. Modifica dello Statuto Sociale.
  4. Varie ed eventuali.


L’assemblea sarà validamente costituita secondo le norme statutarie.

15. Oct
2019

Alessia Goffi y Jana Tomasini la miures de Südtirol

La sajon dl’Atletica Gherdëina Raiffeisen ie jita a piz cun l’ultima garejedes sun l program. La se tratova di campiounac talians de atletica lesiera y dl gran finale Grand Prix, l campiunat de atletica lesiera che se tira tres duta la sajon y pra chël che l’atletes y atlec giata ponc y che fej ala depona la tlassifica finela.

Pra i campiunac talians che fova sun l program ai 4 y 5 de utober se tratovela de se bater a livel naziunel, cun la miëura atletes de duta la Talia. Per pudëi fé pea muessen sambën se cualifiché y demustré de vester i miëures dla provinzia tla disciplina che n se à cualificà. Pra i campiunac talians se à merità de fé pea bën doi atletes che porta i culëures dl’Atletica Gherdëina Raiffeisen. La se trata de Alessia Goffi y de Tomasini Jana. Tramedoves se à davanià la partezipazion a livel talian y tramedoves ie danter la miures dla provinzia. Belen ntan l’ann à Alessia y Jana demustrà costanza ti resultac arjunjan la prima posizions de tlassifica te una o l’autra garejeda. Pra i Campionac talians ieles nsci unides crides ora tramedoves dal trainadëur provinziel Karl Schöpf a rapresenté Südtirol: Alessia tla proves multiples y Jana tl smaché l disch. Pra la garejeda dla proves multiples messova l’atletes sauté i 80metri cun rëmes, fé l saut aut y lonch, smaché la lanza y sauté i 600 metri. Alessia à demustrà de vester te na gran forma arjunjan si record persunel de ponc, nce sce la ti à mpue sciacà tl saut aut ulache la ie stata sota si potenzial de resultat. Purmpò ie Alessia stata danter la miures dla Talia arjunjan la beliscima sesta posizion de tlassifica. Chisc resultatc: 13,01 ti 80 m cun rëmes; 1,50 tl saut aut; 30,13 m tla smaché la lanza; 5,08 m tl saut lonch; 1,48,89 tl sauté i 600 m. De ndut à Alessia arjont 3812 ponc. Vencu à Carboncini Matilde cun 4245 ponc dan Pastore Annalisa cun 4110 ponc y Carpinello Beatrice cun 3944 ponc. Tomasini Jana, che à fat pea tl smaché l disch ie ruveda al 20 esm post cun na mesura de 23,03.

Pra la finale dl Grand Prix, che fova sun l program chëst’ann ai 12 de utober à fat pea sibes la categuria B che nce la A. Pra chësta finale che ie unida fata a Bulsan pudova fé pea mé la miëura 20 tlassifiches. Cun gran sodisfazion udons tlo al prim y segondo post tla categuria A nosta atletes de Gherdëina: Alessia Goffi à venciù l campionat de atletica lesiera 2020 y la vize campiunëssa ie Tomasini Jana. Alessia ie ruveda prima tl smaché l pëis, 3. tl saut aut, 3. ti 600 metri y 4 ti 80 metri sprint; Jana à venciù l saut aut, ie al 2. post ti 80 metri sprint, al 4. post tl smaché l pëis y al 9. post ti 80 metri.

Pra la mutans dla categuria B ne n fovel bën cater che se à cualificà. Duta la mutans finalistes messova fé cater garejedes: 60 m sprint, smaché l pëis, fé l saut aut y sauté i 600 metri. Publicon tlo dessot la posizion finela y la mieura prestazions dl’atletes Sabrina Ploner, Saphira Pitscheider, Ilaria Karbon y Maria Frontull.

Sabrina ie ruveda al 5. post tla tlassifica generela cun n boniscimo segondo post ti 60 metri sprint y terza tl smaché l pëis; Saphira ie ruveda al 8 post assolut vencian la garejeda di 600 metri; Maria ie ruvda al 11 . post assolut y Ilaria al 19. post.

Tla tlassifica per club ie l’Atletica Gherdëina ruveda al segondo post se demustran na gran realtà pra la lies dl atletica de Südtirol.

A duta chësta mutans ti augurons n mumënt de paussa defin merità.

 

Per l’Atletica Gherdëina Raiffeisen
Stefan Planker

 

 

01. Oct
2019

Cin bedaies pra i campionac regiunei per l’Atletica Gherdëina Raiffeisen

I campiunac regiunei, pra chëi che l fej pea atlec de Südtirol y dl Trentin, ie chëst’ann unì metui a jì a Trënt y plu avisa ai 28 y 29 de setëmber. La se tratova per la categuria dla cadetes nce de destaché l ultima chertes per se cualifiché pra i campionac talians de atletica lesiera che ie sun l program ai 5 y 6 de utober a Forlì. Defati vëniel pra chisc campiunac cialà ciuna atletes o atlec che possa demustré su il mieur tëmp o mesura tla disciplines desferëntes y l mieur o la mieura possa pona rapresenté Südtirol a livel talian. Nsci se ova bele Alessia Goffi cualificà dan doi enes tla proves multiples (pentathlon) demustran de vester danter la mieura atletes dla Talia. Leprò se à nce cualificà Jana Tomasini, ëila defenderà i culëures de Südtirol tl smaché l disch.

Nce a Trënt à nosta doi atletes dla categuria cadetes demustrà de vester te na bona forma: Alessia à venciù doi bedaies, una d’or, se davanian nsci l titul regiunel tl saut lonch y una d’arjënt tl sauté i 300 metri cun rëmes. Tl saut lonch à Alessia fat si record persunel arjunjan 5,10 metri y ti 300 cun rëmes iel garateda la bedaia sautan te 47,95. Jana alincontra ie vize campiunëssa regionela tl smaché l disch. Si mesura arjonta ie de 22,24 metri.

De bela prestazions nce per la mëndra categuria

La mutans dla categuria sculees B nes à nce ëiles dat for inò de bela sodisfazions. La mutans alenedes da Denise Delladio y Linda Perathoner, ie states bones de purté a cësa doi bedaies de bront. Drët cumbatuda fova la garejeda de Saphira Pitscheider ti 1000 metri. Sce te Südtirol nes ova Saphira bele usà ite ala udëi sun scialir plu aut dl podest, se tratovela a livel regiunel de messei se bater cun na concurënza plu auta. I trentins defati à nce pra chësta distanzes danieura abù na gran tradizion y nsci nce bon atlec. Saphira cun na bona gestion dla garejeda ie stata bona de ti tenì permez purtan a cësa, do na garejeda nteressanta, la bedaia de bront demustran nsci de tenì pea nce a livel regiunel. Nce Sabrina Ploner, for tla categuria dla sculees B, fova da udëi danieura dancà tla tlassifiches, dantaldut canche la se tratova de smaché l pëis. Nce Trënt iela stata bona de mantenì la conzentrazion purtan a cësa la bedaia de bront propi tl smaché l pëis arjunjan la mesura de 8,53 metri.

A duta chësta mutans ti dijons n drë die vel pai per nes avëi dat truepa emozions y sodisfazions. Inant jirala cun i campionac talians per la categuria cadetes che garejerà a Forlì y ulache per l’Atletica Gherdëina Raiffeisen puderà fé pea coche dit dessëura Alessia Goffi y Jana Tomasini.

 

Per l‘Atletica Gherdëina Raiffeisen
Stefan Planker

24. Sep
2019

Atletica Gherdëina Raiffeisen: Alessia Goffi danter la mieures dla Talia

Per nosta atletes va bel plan va a piz la sajon dl’atletica lesiera, nce sce l mancia mo la finela dl campionat Grand Prix y vel garejeda a livel naziunel. Nce chësc autonn iel for inò sautà ora de bie resultac, nchinamei de marueia, sëni che ntan l’instà iel unì laurà bën y a n bon livel. Ai 14 de setëmber fovel sun l program l campionat regiunel de proves multiples, garejedes pra chëles che nosta atletes possa se bater a livel de duta la region y cun na concurënza sibes de Südtirol che nce de dl Trentin. Bele dai ani ie l’Atletica Gherdëina Raiffeisen spezialiseda te na maniera particulera tla proves multiples, tant che propi l’ann passà fovel sautà ora doi bedaies pra i Campionac Talians assoluc per nosta lia cun l’atlet Alexander Demetz. Nce chëst’ann nes porta la proves multiples for inò de bona sodisfazions. Pra i campionac regiunei defati à Alessia Goffi pedù pië do la bedaia d’or vencian nsci l titul regiunel tla categuria dla sculees A, nce sce la ie mo la jëuna de categuria. N bon plazamënt iel nce garatà per Jana Tomasini, nce sce per Jana purtrue ne n’ala iusta nia bastà per ruvé sun l podest, iela mpo ruveda a n bon cuarto post. Pra chësta categuria muessa la mutans fé l pentathlon, chël uel dì cin disciplines desferëntes pra chëles che n giata ponc aldò dla prestazion y tabela metuda dant dala federazion. Da sautè fovel per la mutans i 80 m cun rëmes pra chëla che Alessia ie sauteda te 13,62 secunc y Jana te 13,30, fé l saut aut ( Alessia 1,53; Jana 1,44), fé l saut lonch (Alessia 4,95; Jana 4,42), smaché la lanza (Alessia 30,64 m; Jana 21,31) y sauté i 600 m (Alessia 1,46,89; Jana 1,58,71). De ndut à Alessia arjont 3777 ponc venciuan l titul regiunel dan Larcher Martina y Somadossi Maria Vittor tramedoves dl GS Trilacum, al cuarto post ie da udëi coche dit Jana Tomasini dl Atletica Gherdëina Raiffeisen cun 3026 ponc. Alessia Goffi ie da udëi tla graduatoria a livel naziunel al boniscimo cuinto post se demustran der vester una dla miures atletes de si categuria dla Talia.
Pra l Grand Prix fat a Lana ai 21 y 22 de setëmber fovel nce tlo plu atletes de Gherdëina che à fat pea. La se tratova de fé l’ultima garejedes dan la finale Grand Prix . Nce tlo ie Alessia stata nia da bater: Alessia à venciù duta trëi la garejedes: l saut aut cun 1,55; i 300 metri cun rëmes ( 48,27) y tl smaché l disch 25,32 m). De bon resultac ie nce garatei per Tomasini Jana: segonda do Alessia tl smaché l disch (22,83); cuarta ti 80 metri sprint (10,78)¸ sesta tl saut aut (1,43).
Tla categuria dla sculees B ie Saphira Pitscheider inò nia stata da bater ti 1000 metri. Saphira à venciù cun n boniscimo tëmp de 3,20,70. Pra n podest ie nce ruveda Ploner Sabrina tl smaché l pëis. Eila ie ruveda terza cun na mesura de 8,39 y tla medema disciplina ie Saphira Pitscheider ruveda cuarta cun 7,83 metri. N bon cuarto post ti ie nce garatà a Maria Frontull che tl saut lonch ie stata bona de arjonjer na lunghëza de 4,15 m. N podest y nsci la bedaia de bront ie sauteda ora nce tla stafëta svedeja, na stafëta ulache l’atletes fej i 100, 200, 300 y 400 metri. La mutans dl team dl Atletica Gherdëina Raiffeisen (Demetz Nina - Karbon Ilaria - Frontull Maria - Ploner Sabrina) ie sautedes te 2,50,50 pudan zapé nsci ncë ëiles sun l podest.
Inant jirala cun la finela Grand Prix a Bulsan ai 12 de utober.

Per l’Atletica Gherdëina Raiffeisen
Stefan Planker

03. Sep
2019

Truep record persunei per l’atletes dl’Atletica Gherdëina Raiffeisen pra l 4. Grand Prix a Kaltern

N dumënia ai 1 de setëmber fovel a Kaltern sun l program la garejedes dl 4. Grand Prix de atletica lesiera. Garajà iel unì sun l bel mplant sportif metù ite a mesa l bosch cun de bona cundizions, ideeles per garejé. Propi chësta cundizions ie nce unides sfrutedes deplën da nosta atletes che à fat pea. Defati iel satà ora truep recorc persunei da pert dl atletes de Gherdëina.
De marueia ie n chësc cont statec i resultac de Alessia Goffi che pra duta la trëi garejedes a chëles che la à tëut pert àla miurà si mesura o tëmp persunel nen vencian doves y ruvan pra una segonda. Jan damprovia cun i resultac iel da auzé ora l beliscimo resultat tl saut lonch. La jëuna de Urtijëi à venciù chësta disciplina cun na mesura dastramp bona: 5,08 metri. Chësta mesura ie nce si record persunel. N auter persunel ie sautà ora tl smaché la lanza. Nce tlo àla venciù la disciplina cun na mesura de 29,74 metri. La bedaia d’arjënt alincontra ie garateda pra l sauté i 300 metri. L tëmp arjont ie stat de 44,54. De ndut à nce Alessia Goffi venciù la 4. Garejeda dl Grand Prix y resta nsci inant prima tla tlassifica. La cumpania de scuadra Jana Tomasini ie nce ëila stata bona de se bater defin bën. Jana à pià do doi iedesc la bedaia d’arjënt y plu avisa una tl saut lonch cun na mesura de 4,62 m y l’autra ti 80 metri cun rëmes cun na prestazion persunela de 13,03 sec. Fat pea à nce per l’Atletica Gherdëina Raiffeisen Alice Karbon che ie ruveda al 8.post ti 80 metri cun rëmes (15,62 sec.); cuinta tl smaché l pëis (6,80 m.) y 12 ejima tl saut lonch (3,87). Selina Jenegger, che à fat pea tl smaché la lanza, ie ruveda al 7. post (20,11 m.).
Tla categuria dla sculees B ie Sabrina Ploner che ie stata bona de se vëncer na bedaia ti 60 metri sprint. Sabrina ie sauteda la distanza te 8.94 sec. pudan nsci pië do la bedaia de bront. Venciù à Hanna Fink cun 8,89. L 5. y ultim Grand Prix unirà fat pona ai 28 de setëmber a Persenon.
De bon resultac ie nce Anna Schenk stata bona de arjonjer pra n meeting a Bulsan tla categuria assoluta. Anna, che ova bele garejà nce ntan l’instà purtan de bon resultac, ie stata bona de se fé valëi sun duta la concurënza te una dla disciplines ulache la garejea l plu gën, y plu avisa ti 200 metri sprint. Vencian chësc meeting cun l tëmp de 26,08 sec se àla davanià la rejon de fé pea pra l Turnier Arge Alp a Dispruch, rapresentan nsci Südtirol ti 200 metri sprint. Chësc turnir unirà fat ai 14 y 15 de setëmber.

Per l’Atletica Gherdëina Raiffeisen
Stefan Planker

08. May
2019

Bën diesc bedaies pra i campionac provinziei de atletica lesiera per l'Atletica Gherdëina Raiffeisen

Sun l program de atletica lesiera fovel chësc ultim fin dl ena ai 04 y 05 de mei i Campionac Provinziei assoluc de atletica lesiera. Garejà iel unì a Persenon. De ndut iel unì dat ora bën 51 titui danter la cetaguria di sculeies y sculees A y B de Südtirol. Nce nosta lia se à presentà cun treup atlec   y atletes ënghe sce l fova n di plutosc de bur tëmp cun dantaldut n gran vënt y frëit. Nce sce la cundizions ne fova nia adatedes per garejé, ne se à nosta atletes nia lascià sciautrì: bën 10 bedaies ie la sportives de Gherdëina states bones de purté a cësa, cun trëi iedesc or, doi iedesc arjënt y  cin iedesc bront. N gran plajëi fejel sambën nce a udëi che i resultac ie garatei te truepa disciplines desferëntes, sibes te chëles asveltes che nce tla longes, ti sauc, ma nce tl smaché la massaries, tant da pudëi di che la preparazion de nosta atletes fova cumpleta te feter uni disciplina.

Sun l podest ie zapeda su doi  iedesc Ploner Sabrina, Goffi Alessia, Tomasini Jana y Pitscheider Saphira. Ploner à venciù la garejeda tl smaché l pëis, cun na mesura de 7,58 secunc y à arjont n terzo post  ti 60 metri sprint (9,05);  Gofffi alincontra  à purtà a cësa na bedaia d'or ti 300 metri cun rëmes sautan la distanza te 49,12 secunc y na bedaia d'arjënt tl saut lonch cun na mesura de 4,93 m; Tomasini ie stata la mieura ti 300 metri sprint cun l tëmp de 44,58 secunc y danter la plu asveltes dla provinzia ti 80 metri sprint arjunjan la bedaia de bront do che la ie sauteda  la curta distanza tl tëmp de 10,85. Pitscheider che garejea per l prim ann tla categuria B ie stata bona de se fé valëi ala per cun la concurënza  pra l smaché la codla, na disciplina propedeutica al smaché la lanza. Cun la mesura de 27,51 ala pudù pie do ala fin la bedaia da vize campunëssa provinziela. La segonda bedaia de Sphira ti ie garateda  cun la cumpanies tla stafëta svedeja. Pra chësta stafëta sauten i 100, 200,300, y 400 metri. L' Atletica Gherdëina Raiffeisen ie stata bona de arjonjer la bedaia  cun Saphira,  Demetz Nina, Frontull Maria, y Karbon Ilaria. La mutans ie sautedes la stafëta svedeja te 2,58,41 menuc.

L rest dla bedaies de bront  ti ie jites a Alice Karbon ti 80 metri cun rëmes (14,26) y a Demetz Sofia ti 1000 metri cun n tëmp de 3,29.

Tl contest de chësta garejedes iel nce unì garjà da atlec de categuries plu autes, ma chisc resultac ne valova nia per l titul provinziel ma fova dldut ntessanc per arjonjer l lim de fé pea pra i campionac talians. Defati ie propi Hanna Insam de Sëlva che ie stata bona tl saut aut de arjonjer l lim y puderà nsci garejé a livel naziunel do che la ie sauteda tl saut aut bën 1,59 metri sëura la stangia ora.

N gran cumplimënt ti fajons a duta chësta mutans per i biei resultac arjonc, ma sambën nce  ai trainadëures (Walter Kostner, Denise Delladio y Linda Perathoner) per l bon lëur fat,  savan da motivé for inò cun i drë cunsëies duta la mutans.

Per l'Atletica Gherdëina Raiffeisen
Stefan Planker

09. Apr
2019

Piei via cun l dë pe: L’Atletica Gherdëina lascia n bon sëni bel pra l prim di de campionat.

L campionat de atletica lesiera per la categuries A y B ie pià via. Nstadì; ai 6 de auril fovel sun l program la prima garejedes ufizieles de atletica lesiera per la sajon 2019, y coche la proves ti meetings ududes de merz nes ova bele demustrà, iel per l’Atletica Gherdëina Raiffeisen sautei ora de bon resultac y de n aut livel pra na concurënza dastramp auta. Defati fovel pra truepa garejedes nchin a 60 atletes scrites ite.
Garejà iel unì a Lana te cundizions de tëmp nia dl dut ideeles, ajache l fova plutosc frëit y n gran vënt, purmpò ne se à nosta atletes nia lascià sciautrì. Pra l Grand Prix fej uni atlet y atleta 3 garejedes. Pra uni garejeda giatun ponc y cumpedan adum chisc ponc sautel ora la posizion de tlassifica. Publicon tlo i resultac dla prima diesc posizions de tlassifica.
Alessia Goffi ie stata bona de ruvé sun l podest te duta trëi garejedes, vencian i 300 m cun rëmes cun l boniscimo tëmp de 48,67. Sun l podest iela ruveda nce tl saut y plu avisa al segondo post cun la mesura de 1,49 y segonda tl smaché l disch cun 20,31 metri. Alessia ie nsci al mumënt al prim post de tlassifica generela. Tla medema categuria ti iel garatedes de bona prestazions nce a Jana Tomasini. Jana ie da udëi al terzo post ti 80 metri sprint cun n boniscimo tëmp de 11,4. Pra chësta garejeda fovel na concurënza dastramp auta, tant che l ova fat pea 58 atletes; terza iela nce tl smaché l disch cun 19,92 y sesta tl saut aut cun na mesura de 1,46.
Nce pra la mëndra categuria iel da udëi ora de bona prestazions, nce sce nosta atletes à scumencià mpermò da puech cun i alenamënc y ne n’ie dessegur mo nia dldut anjeniedes ca. Nsci ie l resultat de Sabrina Ploner ti 60 metri sprint dessegur scialdi nteressant. Sabrina ie ruveda al setimo post de 60 atletes che à fat pea. Ploner à n tëmp de 9,28, ma nia dalonc dal terzo post che fova de 9,20. N sesto post ie Sabrina stata bona de fé nce tl smaché l pëis. Si mesura ie stata de 7,45.
Inant jirala chëst’ena che vën a Bulsan cun l segondo Grand Prix

Per l’Atletica Gherdëina Raiffeisen
Stefan Planker